Metrolarda bəzi mağazalar artıq fəaliyyət göstərməyə başladı.Artıq “Koroğlu” stansiyasında iki ticarət köşkü açılıb və istifadəyə verilib. Onlardan biri yeraltı keçiddə gül dükanı, digəri isə metronun çıxış hissəsində kitab mağazası olaraq, fəaliyyətə başlayıb.
Digər ticarət köşkü isə “Nəriman Nərimanov” metrostansiyasında qurulur. Belə ki, metronun “Nəriman Nərimanov” stansiyasının yeraltı keçidində iki ədəd müasir ticarət köşkü tikilir. Onların tikintisi, demək olar ki, bitmək üzrədir. Xüsusi şüşə konstruksiyalardan ibarət ticarət köşkləri yan-yana olmaqla quraşdırılıb.

Hələlik bu ticarət köşklərində tam olaraq nəyin satılacağı məlum olmasa da seçim çox da geniş deyil. “Bakı Metropoliteni” QSC-dən mətbuata verilən açıqlamada qeyd edilirdi ki, köşklərin fəaliyyəti aşağıdakı istiqamətlərdə olacaq:

– Apteklər şəbəkəsi;
– Su, qəhvə satışı və s. xidmətləri yerinə yetirən çoxfunksiyalı aparatlar;
– Kitab ticarəti şəbəkəsi;
– Gül salonları şəbəkəsi.

O da deyilirdi ki, ticarət obyektləri özünü alıcılar arasında yetərincə isbat etmiş firma və şirkətlərə icarəyə veriləcək. Kitab satışı artıq “Əli və Nino” kitab evinə həvalə edilib.

Bu ticarət köşkləri də kitab və ya gül satışı ilə məşğul olacaq, ya da aptek kimi fəaliyyət göstərə biləcək. Mətbuat orqanları, oxucular və bizim üçün də metroda ticarətin bərpa edilməsi yalnız bir halda sevindirici ola bilər. O da qəzet və jurnal satışının yenidən bərpa edilməsidir.
Kitab satışı ilə məşğul olan şəxslər də bu işdə maraqlıdırlar. Çünki metro keçidlərində ən çox satılan şeylərdən biri də qəzetlərdir. Artıq kitab satışı ilə məşğul olan şəxslər Bakı Metropoliteninin rəisinə məktub göndəriblər.

Onlar metropoliten ərazisində kitab satışı üçün nəzərdə tutulmuş yerlərlə bağlı müraciət ediblər. Kitab satıcıları həmin yerlərdə köşk qoyulması üçün Metropoliten rəisindən icazə istəyiblər.
“Bizim assosiasiyanın üzvləri Bakı Metropoliteni ərazisində kitab satışı ilə paralel olaraq, qəzet satışı ilə də məşğul olurdular. Biz qəzet satışının da bərpa olunmasını istəyirik və gözləyirik. Amma hələlik Metropoliten qəzetin adını tutmur. Kitab, gül satışına və aptekə icazə veriləcəyi bildirilir. Əlbəttə, biz qəzet satışının da bərpasını gözləyirik, bunu arzu edirik. Metroda aptekdənsə, mətbuatın olması daha yaxşı olardı. Yəqin ki, qəzet satışına da icazə veriləcək”, – bu sözləri musavat.com-a Yayım Assosiasiyasının rəhbəri Yaşar Zeynalov deyib.
Azadliq.az