Gömrükçülər Ermənistan mənşəli olduğuna dair kifayət qədər sübutlar olan 8 tondan artıq kənd təsərrüfatı məhsulunun ölkəyə gətirilməsinin qarşısını alıb.

Dövlət Gömrük Komitəsi Mətbuat Xidmətindən daxil olan məlumata görə, Tovuz Gömrük İdarəsinin “Sınıq Körpü” gömrük postunda aşkar edilən 3 fakt üzrə 8130 kq meyvə – ərik saxlanılıb. İlkin araşdırma zamanı gömrükçülər malın Ermənistan mənşəli olduğunu müəyyənləşdirib. Belə ki, Gürcüstan istiqamətindən ölkəyə gələn Azərbaycan vətəndaşı Süleymanov İsmayil Qoqu oğlunun idarə etdiyi avtomobildə mənşəyi məlum olmayan, ümumi çəkisi 6300 kq ərik aşkar edilib. Yoxlama zamanı malın qablaşdırıldığı qutuların üzərində markerlə erməni dilində yazılar müəyyən olunub.

İkinci fakt isə Azərbaycan vətəndaşı Kəlayev Seymur Maqsim oğlunun idarə etdiyi Ford Tranzit markalı avtomobildə aşkar edilib. Gömrükçülər avtomobildə mənşəyi məlum olmayan 630 kq ərik olduğunu müəyyənləşdirib. Əriyin qablaşdırıldığı qutuların üzərinin Ermənistanda çap olunan erməni dilində çap məhsulları – qəzet səhifələri ilə örtülməsi malın Ermənistan mənşəli olduğunu sübuta yetirib.

Azərbaycan vətəndaşı Musayev Ağakişi Musa oğlunun idarə etdiyi Ford Tranzit markalı avtomobildən isə eyni üsulla qablaşdırılaraq, üzəri Ermənistanda çap olunan qəzet səhifələri ilə örtülən 1200 kq ərik aşkar edilib.

Həmin yüklərin mənşə ölkəsini müəyyən edən hər hansı sənədin olmadığına və mənşə ölkəsinin Ermənistan olduğuna əsas verən kifayət qədər sübutlar olduğuna görə, yuxarıda göstərilən nəqliyyat vasitələri gömrükçülər tərəfindən saxlanılaraq mənşəyi məlum olmayan malın respublika ərazisinə idxalına icazə verilməyib. (qafqazinfo.az)

Azadliq.az