21:52 xeber – Prezident İlham Əliyev Londonda Suriyaya və regiona dəstək konfransından da Azərbaycanın bir nömrəli probleminə diqqəti beynəlxalqlaşdırmaq fürsəti kimi istifadə etdi. Dövlət başçısı Suriya qaçqınlığı mövzusunu Qarabağ münaqişəsi nəticəsində didərgin düşmüş milyona yaxın azərbaycanlının dərdi ilə paralelləşdirdi.

İlham Əlievin çıxışının kökündə beynəlxalq yanaşmaları, ikiüzlü münasibətlər sistemini məhkum etmək xətti dayanırdı. Amma o bu xətti son dərəcə diplomatik tərzdə təqdim etdi. Yəni çıxışdan heç də belə çıxmırdı ki, niyə suriyalıların dərdinə belə şərik olursunuz, amma Qarabağdan, Ermənistandan dərdəbər salınan azərbaycanlıların fəlakəti qarşısında susurdunuz? Əsla. Azərbaycanın mövqeyini qısaca belə şərtləndirmək olar: Biz suriyalıların dərdini sizdən daha yaxşı anlayırıq, çünki başımıza gəlib, biz onlara ona görə kömək etmirik ki, bunu siz istəyirsiniz, ona görə kömək edirik ki,bunu biz istəyirik, çünki bilirik ki, bu dərd nədir.

“Biz Suriya qaçqınlarının halına çox acıyırıq. Müstəqillik illərində – 1990-cı illərin əvvəlində qonşu Ermənistan Azərbaycana qarşı təcavüz edəndə Azərbaycan özü humanitar fəlakət və böhrandan əziyyət çəkib. Bu təcavüz nəticəsində Azərbaycanın beynəlxalq səviyyədə tanınmış ərazisinin 20 faizi işğal olundu. Biz etnik təmizləməyə məruz qaldıq. Bir milyondan artıq azərbaycanlı qaçqın və məcburi köçkün vəziyyətinə düşdü. Bu, həqiqətən də humanitar fəlakət idi. O zaman ölkəmiz çox gənc və kasıb idi. Həmin vaxt adambaşına düşən qaçqın sayına görə ən yüksək göstərici olan səkkiz milyon əhalidən bir milyonu evsiz və işsiz qalaraq, yaşayış imkanlarından məhrum olmuşdu.

Bu gün Azərbaycan özü donor ölkədir. Biz, Suriya qaçqınları da daxil olmaqla maliyyə yardımını təmin edirik. Azərbaycan Suriyada humanitar inkişafa artıq töhfə vermiş və verəcək ölkələr arasındadır. Lakin ən əsası sülh, atəşkəs, siyasi həllin tapılmasıdır”,- deyə prezident İlham Əliyev çıxışı zamanı bildirib.

mənbə :
anspress