[r32]

6 May, 2020  15:22 xeber –

Türkiyənin Bursa şəhərində koronavirus şübhəsi ilə aprelin 23-də müalicə aldığı xəstəxanada vəfat edən 5 yaşlı Kasım Toktaşın əsl ölüm səbəbi bəlli olub.

“Report” yerli “Gazetevatan” nəşrinə istinadən xəbər verir ki, K.Toktaşın atası, hazırda həvəskar liqada “Bursa Yıldırımspor”da çıxış edən futbolçu Cevher Toktaş 11 gün sonra oğlunu boğaraq öldürdüyünü etiraf edib.

2008/2009 mövsümündə “Hacettepespor”la Türkiyə Super Liqasında çıxış etmiş 33 yaşlı yarımmüdafiəçi məhkəmədə əməlini boynuna alıb. O, 15 dəqiqə ərzində yastığı oğlunun başında tutduğunu söyləyib: “Oğlum çırpınırdı, amma mən ölənə qədər basmağa davam etdim”.

Toktaş oğlunu sevmədiyini üçün öldürdüyünü deyib: “Mənim iki oğlum var. Ölən oğlumu doğulduqdan sonra heç sevmədim, niyə sevmədiyimi də bilmirəm. Onu boğaraq öldürməyimin səbəbi, sadəcə onu sevməməyimdir. Sağlamlıqla bağlı və psixi problemlərim yoxdur”.

Cevher Toktaş məhkəmə zalındaca həbs olunub.

mənbə :
Report.az