14.10.2015 / 22:54 xeber –

İki gün öncə Qubanın Zərdabi kəndində fermer Elvir Bayramovun bağından alma oğurlayan şəxslər tapılıb. Bu barədə APA TV-nin şimal bürosuna sahibkar özü məlumat verib.

Onun sözlərinə görə, alma oğrularının izini polisdən qabaq özü və qardaşı müəyyən edib. Bundan sonra polisə məlumat veriblər. Oğurlanan 150 yeşiyə yaxın alma Qubanın Barlı kənd sakini Qiyaməddin Yunusovun həyətində aşkarlanıb. Polisin iştirakı ilə tapılan 5 tona yaxın alma sahibkara təhvil verilib: "Səhəri gün qardaşımla texnikanın izi ilə gedib oğurlanan meyvəni bir evdən tapdıq. Həmin dəqiqə polisə məlumat verdik. Meyvə açıq şəkildə həyətə vurulmuşdu və üstü bağlanmışdı. Meyvəni görən kimi bildik ki, bizim meyvədir. Özümüz tapdıq və polisə məlumat verdik. Sonra da polis gəlib həmin şəxsləri şöbəyə apardı".

Quba Rayon Polis Şöbəsinin Zərdabi kəndi üzrə sahə müvəkkili Şahin Ağamaliyev isə bildirib ki, hazırda oğurluq etməkdə təqsirli bilinən 3 nəfər saxlanılıb. Bunlar Barlı kənd sakinləri Pərviz Yunusov, Zaur və İlkin adlı şəxslərdir. Hazırda faktla bağlı araşdırma aparılır.

mənbə :
lent.az