İçeriğe geçmek için "Enter"a basın

Əli Abbasov prokurorluqda dindirilib

30-10-2015

eliabbasov2Rabitə və yüksək texnologiyalar naziri Əli Abbasov prokurorluqda dindirilib.

Azadliq.az xəbər verir ki, Virtualaz.org-un yaydığı xəbərə görə, nazir dünən – oktyabrın 29-da Baş Prokuror yanında Korrupsiyaya Qarşı Mübarizə Baş İdarəsinə çağırılıb və Baş Prokurorluq əməkdaşları tərəfindən bir neçə saat ərzində sorğu-sual olunub. Məlumata görə, Əli Abbasov bu qalmaqallı işə şahid kimi cəlb olunub və rəhbərlik etdiyi nazirliyin əməkdaşlarının həbsi ilə bağlı istintaq edilib.

Sayt yazıb ki, Ə. Abbasov müstəntiqlərin əsasən Vidadi Zeynalovun istintaqa verdiyi ifadələrlə bağlı suallarını cavablandırıb. İlkin məlumatlara görə, nazirliyin keçmiş Aparat rəhbəri V.Zeynalov nazir Ə.Abbasovun əleyhinə ifadə verib.

Qeyd edək ki, ötən gün nazirin vəzifədən azad edilməsi barədə məlumatlar yayılsa da, gün ərzində öz rəsmi təsdiqini tapmadı. Nazir Ə.Abbasovun işdən çıxarılması barədəki şayiələrin belə sürətlə yayılmasına rəvac verən səbəblərə gəlincə isə belə səbəblər var. Məsələ burasındadır ki, bu günlərdə Rabitə və Yüksək Texnologiyalar Nazirliyinin yüksək rütbəli əməkdaşları, o cümlədən nazirliyin Aparat rəhbəri Vidadi Zeynalov, Beynəlxalq Əlaqələr və Hesablaşmalar Mərkəzinin direktoru Cəlil Cəfərov, “Bakı Telefon Rabitəsi” İstehsalat Birliyinin baş direktoru Beytulla Hüseynov həbs olunublar. Bu məmurların həbsi MTN-in sabiq rəhbəri Eldar Mahmudov ətrafındakı qalmaqal çərçivəsində həyata keçirilib.

***

Rabitə və Yüksək Texnologiyalar Nazirliyi Əli Abbasovun Baş Prokurorluqda dindirilməsi ilə bağlı yayılan xəbərlərə reaksiya verib. Nazirin müşaviri Müşfiq Əmirov AzNews.az-a bildirib ki, Əli Abbasov hazırda işdədir: “Əli müəllimin dindirilməsi məsələsindən xəbərsizəm. lakin nazir hazırda işdədir. Təkcə nazir deyil, ümumilikdə nazirliyin bütün işçiləri hazırda iş başındadır. Nazirliyə giriş və çıxış da həmişəki kimidir”.

Əli Abbasov prokurorluqda dindirilib