[r32]
Xəbər verdiyimiz kimi, İrandan Azərbaycana gələn daha 2 nəfərdə koronavirus aşkar edilib.

TƏBİB-dən “Qafqazinfo”ya verilən məlumata görə, həmin şəxslər 1973-cü il və 1998-ci il təvəllüdlü Azərbaycan vətəndaşlarıdır.

17.06.1973-cü il təvəllüdlü şəxs fevralın 26-da xəstəxanaya yerləşdirilib. O, 1 gün Tehranda, 3 gün Təbrizdə olub.

29.04.1998-ci il təvəllüdlü şəxs isə Qum şəhərindən gəlib. O da fevralın 26-da xəstəxanaya yerləşdirilib.

******

Nazirlər Kabineti yanında operativ qərargah koronavirus şübhəsi ilə karantində olan şəxslər barədə növbəti dəfə məlumat yayıb.

Operativ qərargahdan bildirilib ki, İran İslam Respublikasından qayıdan iki Azərbaycan vətəndaşında koronavirus xəstəliyinin əlamətləri müşahidə edilib.

Müvafiq qaydalara uyğun olaraq həmin şəxslər xəstəxananın xüsusi rejimli infeksion boksunda yerləşdirilib. Aparılmış müayinələr nəticəsində onlarda koronavirusa yoluxma faktı qeydə alınıb.

Hazırda pasiyentlərin müalicəsi aparılır, onların vəziyyəti sabitdir.

Digər yoluxma hallarının aşkarlanması ilə bağlı həmin xəstələrin kontaktlarının müəyyən edilməsi istiqamətində müvafiq tədbirlər görülür.

Bununla da Azərbaycanda koronavirusa yoluxma faktı təsdiqlənən şəxslərin sayı 3-ə çatıb.